Ang Katotohanan sa Akin, Hindi Ako Nahihiyang Sabihin

ni Lara Pamela H. Pomer

Lahat tayo'y dumaraan sa pagsubok at mga problema na maaring magdulot sa'tin ng iba't ibang karanasan, kakayahan at minsan rin namay kahinaan. Ang mga pangyayaring tulad nito na dulot ng ating mga pagkakamali o minsan ay ang katotohanan na umiikot sa mundo na walang madali, ay  nagpapalakas sa atin dahil ating napapagtanto na hindi maling magkamali kailanman. Karugtong nito ay ang nag-iisang taong hindi tayo kailanman pababayaan sa ating pagkakadapa.

Ako, bilang isang taong nabubuhay na ng mahigit labing-anim na taon, ay marami naring naging karanasan na magsasalamin sa kung ano ako ngayon. Madalas, nararamdaman kong malapit narin akong sumuko at mawalan ng lakas ng loob dahil sa sakit, hirap at kaguluhang dinudulot ng mga problemang nakikisabay sa pag-ikot ng aking buhay na hindi ko na kinakayang panghawakan dahil sa sobrang bigat at komplikado nito. Ngunit, aking naiisip na, mabuti rin namang may dumating na pagsubok sa akin. Maari kong makita ang mga kahinaan at kalakasan ko, na nagdudulot ng aking pagpapatuloy ng pananalig sa Panginoon at magkaroon pa ng mas malalim na pananampalataya sa Kanya. Kung ating iisipin, minsa'y ang labong pakinggan dahil nagagawa ko pang magpasalamat sa Panginoon dahil binibigyan Niya ako ng pagsubok na magbibigay ng malaking realisasyon sa akin at sa aking buhay. Madalas kong sinasabi sa aking sarili na "walang pagsubok na binibigay ang Panginoon na hindi ko kayang lampasan at lutasin dahil alam Niya ang aking kakayahan at kahinaan. Hindi Niya ako pababayaan".

Kung magkamali man ako, walang masama. Mas pinabubuti Niya ako dahill gamit ang mga pagkakamaling ito, natututo akong bumangon sa sarili kong paa. Magpagpag ng buhanging dumikit sa aking tuhid dulot ng pagkakadapa at ipakitang "Okay lang ako. Kaya ko pa". Sa lahat ng aking pagkakamali, natututo ako at nagkakaroon ng leksyon na magpapabuti kung sino ako at kung ano ang mga dapat gawin ko bilang isang taong may malalim na pananampalataya sa Panginoon. Walang taong hindi nagkakamali at walang aalinlangan kong inaaming isa ako doon.



Lara Pomer 09/03/11 11:11 PM